ឯកឧត្តម​ ឈា​ ប៊ុនរិទ្ធ​ ប្រធានមុខព្រួញ ខេត្តកំពង់ចាម បានចុះពិនិត្យស្ថានភាពទឹកទន្លេមគង្គ​ ទឹកនៅតាមទំនប់អាងទឹក​ និងប្រព័ន្ធធារាសាស្ត្រមួយចំនួន​  

ខេត្តកំពង់ចាម ÷ នៅថ្ងៃចន្ទ​ ១០រោច ខែអស្សុជ​ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១២​ ខែតុលា ឆ្នាំ២០២០ ឯកឧត្តម​ ឈា​ ប៊ុនរិទ្ធ​ អគ្គនាយកកិច្ចការបច្ចេកទេស​ និងជាប្រធានមុខព្រួញ ខេត្តកំពង់ចាម រួមដំណេីរដោយលោក​ តាំង​ សុផាត​​ អគ្គនាយករង​​កិច្ចការបច្ចេកទេស​ សហការជាមួយលោកប្រធានមន្ទីរធនធានទឹក និងឧតុនិយមខេត្តកំពង់ចាម​ ព្រមទាំងមន្រ្តីជំនាញក្រសួង​ និងមន្ទីរ​ បានចុះពិនិត្យស្ថានភាពទឹកទន្លេមគង្គ​ ទឹកនៅតាមទំនប់អាងទឹក​ និងប្រព័ន្ធធារាសាស្ត្រមួយចំនួន​ ព្រមទាំងការងារបង្កបង្កើនផលស្រូវរដូវវស្សានៅក្នុងខេត្ត។
តាមការពិនិត្យជារួមស្ថានភាពទឹកទន្លេមេគង្គ​ពិនិត្យត្រឹមល្ងាច នេះ ទឹកមេគង្គមានកំពស់ ១០.០៤ម៉ែត្រ ហើយកំពុងហក់ឡើងចូលព្រែកមួយចំនួន រីឯទំនប់អាងទឹក មួយចំនួននៃប្រព័ន្ធធារាសាស្រ្តទទួលបរិមាណទឹកភ្លៀង​ពេញស្ទេីរតែទាំងស្រុង​ សម្រាប់បម្រេីឲ្យការងារបង្កបង្កេីនផលស្រូវរដូវប្រាំងនាពេលខាងមុខ។
ដោយឡែកមន្ទីរធនធានទឹក​ និងឧតុនិយមខេត្តកំពង់ចាម​ ក៏បានបង្កេីនការយកចិត្តទុកដាក់លេីការគ្រប់គ្រងបរិមាណទឹកដែលលេីសពីលទ្ធភាពស្តុកទុករបស់ទំនប់អាងទឹក​និមួយៗ​ ដោយចាត់ឲ្យមានឆ្មាំប្រចាំការជាប់ជាប្រចាំ​សម្រាប់បញ្ជាបិទបេីកទ្វារទឹក​ ក្នុងបរិបទដែលកម្ពុជាកំពុងទទួលរងនូវឥទ្ធិពលប្រព័ន្ធវិសម្ពាធទាប​ ក៏ដូចជាការត្រៀមបង្ការ​ និងទប់ស្កាត់នូវគ្រោះមហន្តរាយដែលអាចកេីតមានឡេីងជាយថាហេតុនាចុងរដូវវស្សានេះ ៕