​ឯកឧត្តម​ ឈា ប៊ុនរិទ្ធ អគ្គនាយកកិច្ចការបច្ចេកទេស បានអញ្ជេីញដឹកនាំកិច្ចប្រជុំ​ ស្តីពី​ការធ្វេីបច្ចុប្បន្នភាពនៃការអនុវត្តរបាយការណ៍ការចូលរួមចំណែករបស់ជាតិ​ ដេីម្បីអនុវត្តអនុសញ្ញាក្របខ័ណ្ឌសហប្រជាជាតិ​ ស្តីពីការប្រែប្រួលអាកាសធាតុនៅលេីប្រព័ន្ធត្រួតពិនិត្យក្របខ័ណ្ឌតម្លាភាពសម្រាប់ឆ្នាំ២០២១

នៅរសៀលថ្ងៃចន្ទ ១២កេីត ខែផល្គុន ឆ្នាំឆ្លូវ ត្រីស័ក ព.ស​ ២៥៦៥ ត្រូវនឹងថ្ងៃទី​១៤ ខែមីនា​ ឆ្នាំ២០២២ នៅទីស្តីការក្រសួងធនធានទឹក​ និងឧតុនិយម​ ឯកឧត្តម​ ឈា ប៊ុនរិទ្ធ អគ្គនាយកកិច្ចការបច្ចេកទេស បានអញ្ជេីញដឹកនាំកិច្ចប្រជុំ​ ស្តីពី​ការធ្វេីបច្ចុប្បន្នភាពនៃការអនុវត្តរបាយការណ៍ការចូលរួមចំណែករបស់ជាតិ​ ដេីម្បីអនុវត្តអនុសញ្ញាក្របខ័ណ្ឌសហប្រជាជាតិ​ ស្តីពីការប្រែប្រួលអាកាសធាតុនៅលេីប្រព័ន្ធត្រួតពិនិត្យក្របខ័ណ្ឌតម្លាភាពសម្រាប់ឆ្នាំ២០២១។​ កិច្ចប្រជុំនេះ​ មានការអញ្ជេីញចូលរួមពីលោកអគ្គនាយករង​កិច្ចការបច្ចេកទេស លោកប្រធាន និងអនុប្រធាននាយកដ្ឋានជំនាញពាក់ព័ន្ធ​ផងដែរ។
នៅក្នុងកិច្ចប្រជុំ​ ឯកឧត្តមអគ្គនាយក​កិច្ចការបច្ចេកទេស​ បានជម្រាបជូន​ អំពីសាវតារ​ និងគោលបំណងនៃកិច្ចប្រជុំដោយបានគូសបញ្ជាក់ថា​ កាលពីថ្ងៃទី១៩​ ខែធ្នូ​ ឆ្នាំ២០១៦​ ព្រះរាជាណាចក្រ​កម្ពុជា​ បានផ្តល់សច្ចាប័នលេីកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ។ ដូចនេះ​ រដ្ឋភាគីទាំងអស់នៃកិច្ចព្រមព្រៀងរួមទាំងប្រទេសកម្ពុជា​ តម្រូវឲ្យរៀបចំបំពេញនូវរបាយការណ៍បច្ចុប្បន្នភាព​ ស្តីពីការចូលរួមចំណែករបស់ជាតិ​ ដេីម្បីអនុវត្តអនុសញ្ញាក្របខ័ណ្ឌសហប្រជាជាតិ​ ស្តីពីការប្រែប្រួលអាកាសធាតុ (Updated NDC)។ ជាមួយគ្នានេះផងដែរ​ ប្រទេសកម្ពុជា​ បានអនុម័តនូវរបាយការណ៍បច្ចុប្បន្នភាពនេះកាលពីខែធ្នូ​ ឆ្នាំ២០២០​ ហេីយបានដាក់ឲ្យដំណេីរការ​ និងផ្តល់វគ្គបណ្តុះបណ្តាលអំពីប្រព័ន្ធត្រួតពិនិត្យក្របខ័ណ្ឌតម្លាភាពនេះ​ កាលពីខែធ្នូ​ ឆ្នាំ២០២១​ កន្លងទៅផងដែរ។ សម្រាប់ប្រព័ន្ធត្រួតពិនិត្យ​ តាមដាន​ និងវាយតម្លៃនូវភាពរីកចម្រេីននៃការអនុវត្ត​ Updated NDC និងសម្រាប់រៀបចំរបាយការណ៍វឌ្ឍនភាពនេះ​ នឹងត្រូវធ្វេីឡេីងនៅក្នុងខែកុម្ភ:​ ជារៀងរាល់ឆ្នាំ។ ក្នុងន័យនេះ​ ក្រសួង-ស្ថាប័នពាក់ព័ន្ធ​ ត្រូវតែបំពេញនូវរបាយការណ៍វឌ្ឍនភាពនៃការអនុវត្ត Updated NDC ឲ្យបានទាន់ពេលវេលា​ ដេីម្បីឆ្លេីយតបទៅនឹងបរិបទនៃការប្រែប្រួលអាកាសធាតុសាកលផងដែរ៕