| ឯកឧត្តម លឹម គានហោ អញ្ជើញជាអធិបតីក្នុងការពិនិត្យ និងដាក់ដំណើរការសាកល្បងស្ថានីយរ៉ាដា តេជោសែន |
|
នៅព្រឹកថ្ងៃទី ០៤ ខែមេសា ឆ្នាំ ២០១២ នៅក្រសួងធនធានទឹក និងឧតុនិយម បានរៀបចំកិច្ចប្រជុំការងារ ដើម្បីដាក់ឲ្យដំណើរការសាកល្បងស្ថានីយរ៉ាដាតេជោសែន ក្រោមអធិបតីភាពឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម ដោយមានការចូលរួមពីឯកឧត្តមថ្នាក់ដឹកនាំក្រសួង ថ្នាក់ដឹកនាំ នាយកដ្ឋានចំណុះក្រសួង ក្រុមបច្ចេកទេសឧតុនិយម និងសហភាគីបារាំង ។ លោកអ៊ុំ រីណា ប្រធាននាយកដ្ឋានឧតុនិយម បានធ្វើបទបង្ហាញអំពីសង្វាក់នៃសេវាឧតុនិយម ដោយរួមទាំងលទ្ធភាព និងសមត្ថភាព នៃស្ថានីយថ្មីនេះ ។ ការធ្វើទំនើបកម្មវិស័យឧតុនិយម នៅកម្ពុជា នេះគឺជាការបូកបញ្ចូលគ្នារវាងការព្យាករណ៍បែបវាស់ និងប្រព័ន្ធទិន្នន័យថ្មី ។ ប្រព័ន្ធឧតុនិយមទំនើបនេះរួមបញ្ចូលទាំងការទទួលទិន្នន័យពីសហភាគីបារាំង (Meteo France International) និងប្រព័ន្ធទិន្នន័យរ៉ាដានៅកម្ពុជាតែម្តង ។ រ៉ាដានេះមានលទ្ធភាពព្យាករណ៍រហូតដល់ ៦ខែ លើកំរិតកំពស់ទឹកភ្លៀង និងសីតុណ្ហភាព ។ ក្នុងឪកាសនោះដែរ ឯកឧត្តមរដ្ឋមន្ត្រី លឹម គានហោ បានមានប្រសាសន៍ផ្តាំផ្ញើរដល់អ្នកបច្ចេកទេសត្រូវយកចិត្តទុកដាក់លើការប្រើប្រាស់ឧបករណ៍ឧតុនិយម ដ៏ទំនើបនេះឲ្យមានប្រសិទ្ធិភាព ពោគឺបើមានឧបករណ៍ល្អហើយ ខ្វះខាតក្នុងការយកចិត្តទុកដាក់ក្នុងការប្រើប្រាស់នោះ ពុំទទួលបាននូវលទ្ធភាពនោះទេ ។ ឯកឧត្តមរដ្ឋមន្រ្តីបានបន្តទៀតថា ទិន្នន័យដែលទទួលបានត្រូវយកមកបញ្ចូលគ្នាទាំងទិន្នន័យតាមវិធីវាស់ (តាមវិធី statelit Reception, Global telecommunication system និង observation by station) និងទិន្នន័យដែលទទួលបានពីសហភាគីបារាំង (Meteo France International) និង Weather Radar ដើម្បីធ្វើការវិភាគ និងព្យាករណ៍ឲ្យមានសុក្រិត ។
|
