ឯកឧត្តម ថោ ជេដ្ឋា រដ្ឋលេខាធិការ និងឯកឧត្តម ឈា ប៊ុនរិទ្ធ អគ្គនាយកកិច្ចការបច្ចេកទេស នៃក្រសួងធនធានទឹក និងឧតុនិយម មានការចូលរួមពីទីប្រឹក្សាគម្រោង WAT4CAM បានដឹកនាំមន្ត្រីក្រសួង និងមន្ទីរចុះពិនិត្យមើលអាងស្តុកទឹក និងសំណង់កាត់ស្ទឹងសំខាន់ៗមួយចំនួន

33
Views: 206
ខេត្តបាត់ដំបង-ខេត្តបន្ទាយមានជ័យ-ខេត្តឧត្តរមានជ័យ ÷ ចាប់ពីថ្ងៃចន្ទ ៩កេីត ដល់ថ្ងៃព្រហស្បតិ៍ ១២កេីត ខែមិគសិរ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៣ ដល់ថ្ងៃទី១៦ ខែធ្នូ ឆ្នាំ២០២១ ឯកឧត្តម ថោ ជេដ្ឋា រដ្ឋលេខាធិការ និងឯកឧត្តម ឈា ប៊ុនរិទ្ធ អគ្គនាយកកិច្ចការបច្ចេកទេស នៃក្រសួងធនធានទឹក និងឧតុនិយម អមដំណើរដោយប្រធាន អនុប្រធាននាយកដ្ឋានជំនាញពាក់ព័ន្ធ សហការជាមួយប្រធានមន្ទីរធនធានទឹក និងឧតុនិយមខេត្តចំនួន ០៣ រួមមាន ៖ខេត្តឧត្តរមានជ័យ ខេត្តបន្ទាយមានជ័យ និងខេត្តបាត់ដំបង និងមានការចូលរួមពីទីប្រឹក្សាគម្រោង WAT4CAM បានដឹកនាំមន្ត្រីក្រសួង និងមន្ទីរចុះពិនិត្យមើលអាងស្តុកទឹក និងសំណង់កាត់ស្ទឹងសំខាន់ៗមួយចំនួន ក្នុងគោលបំណងប្រមូលធាតុចូល និងព័ត៌មានបន្ថែម ដើម្បីឈានទៅរៀបចំចងក្រងជានីតិវិធីឬ សៀវភៅគោលការណ៍ណែនាំសម្រាប់ការគ្រប់គ្រង និងកិច្ចដំណើរការអាងស្តុកទឹក (Reservoir Operation&Managment and dam safety) ឲ្យមានប្រសិទ្ធភាពខ្ពស់ក្នុងការឆ្លើយតបទៅនឹងការគ្រប់គ្រងធនធានទឹកចម្រុះដោយនិរន្តភាពក្នុងបរិបទនៃការប្រែប្រួលអាកាសធាតុ។
អនុក្រុមការងារបច្ចេកទេសគ្រប់គ្រងប្រព័ន្ធធារាសាស្រ្ត(Sub-TWG-ISM) ដែលបានបង្កើតឡើងដោយឯកឧត្តមរដ្ឋមន្រ្តី និងទទួលភារកិច្ចដឹកនាំដោយឯកឧត្តមរដ្ឋលេខាធិការបានទទួលការគាំទ្រផ្នែកបច្ចេកទេសពីក្រុមទីប្រឹក្សាបច្ចេកទេសនៃគម្រោងWAT4CAM ក្រោមជំនួយឧបត្ថម្ភរបស់ទីភ្នាក់ងារអភិវឌ្ឍន៍បារាំង AFD បាន និងកំពុងដំណើរការនូវសកម្មភាពជាច្រើនក្នុងការរៀបចំនីតិវិធី និងគោលការណ៍ណែនាំនានាបំពេញបន្ថែមទៅលើច្បាប់ អនុក្រឹត្យ និងបទដ្ឋានគតិយុត្តដែលមាន សំដៅធ្វើយ៉ាងណាដើម្បីធានាបាននូវការគ្រប់គ្រងធនធានទឹក និងប្រព័ន្ធធារាសាស្រ្តនៅទូទាំងប្រទេស ឲ្យមានប្រសិទ្ធភាពខ្ពស់ និងមាននិរន្តរភាព។
ក្នុងដំណើរបំពេញបេសកកម្មនេះ ក្រុមការងារបានចុះដកស្រង់បទពិសោធន៍ ប្រមូលធាតុចូល និងប្រមូលព័ត៌មានមួយចំនួនពីអាងស្តុកទឹក និងសំណង់កាត់ស្ទឹងសំខាន់ៗចំនួន ០៤រួមមាន ៖

១.ទំនប់ពហុបំណង (សេកសក) មានទីតាំងស្ថិតក្នុងឃុំផ្លូវមាស ស្រុករតនៈមណ្ឌល ខេត្តបាត់ដំបង អាចមានលទ្ធភាពស្រោចស្រពលើផ្ទៃដីសរុបចំនួន ៤៧.០០០ហិកតា និងស្រោចស្រព ផ្ទៃដីស្រែប្រាំងបាន ចំនួន ១២.០០០ហិកតា។

២.គម្រោងអភិវឌ្ឍន៍ទំនប់សាលាតាអន មានទីតាំងស្ថិតនៅក្នុងក្រុងបាត់ដំបង ខេត្តបាត់ដំបង ជាគម្រោងមួយក្រោមហិរញ្ញប្បទានសម្បទានរបស់សាធារណរដ្ឋកូរ៉េ ក្នុងដំណាក់កាល​ឈានបញ្ចប់នា ពេលខាងមុខនេះ ។ គម្រោងអភិវឌ្ឍន៍ទំនប់សាលាតាអន អាចផ្គត់ផ្គង់ទឹក សម្រាប់ការស្រោចស្រព លើផ្ទៃដី ស្រូវវស្សាបាន ចំនួន ១១.០០០ ហិកតា ផ្ទៃដីស្រូវប្រាំងបាន ចំនួន ៤.០០០ ហិកតា ។

៣.ប្រព័ន្ធធារាសាស្រ្តកង្ហត មានទីតាំងស្ថិតក្នុងឃុំចែងមានជ័យ ស្រុកបាណន់ ខេត្តបាត់ដំបង អាច មានលទ្ធភាពស្រោចស្រពលើផ្ទៃដីសរុបចំនួន ៧០.០០០ហិកតា។

៤-អាងស្ទឹងស្រែងជំហានទី១ និងជំហានទី២ មានទីតាំងស្ថិតក្នុងភូមិស្រះកែវ ឃុំពង្រ ស្រុកចុងកាល់ ខេត្តឧត្តរមានជ័យ មានលទ្ធភាពស្រោចស្រពលើផ្ទៃដីជាង ២៥.០០០ហិកតា ក្នុងខេត្តចំនួន៣ ខេត្តឧត្តរមានជ័យ បន្ទាយមានជ័យ  និងខេត្តសៀមរាប ។ បច្ចុប្បន្នអាងស្ទឹងស្រែងទាំងពីរ កំពុងតែដើរតួនាទីយ៉ាងសំខាន់ក្នុងការផ្ដល់ប្រភពទឹក សម្រាប់ប្រជាពលរដ្ឋ ដែលខ្វះទឹកប្រើប្រាស់ ដឹងស្រោចស្រពដំណាំកសិកម្ម ។

៥-ទំនប់អាងត្រពាំងថ្ម មានទីតាំងស្ថិតក្នុងស្រុកភ្នំស្រុក និងស្រុកព្រះនេត្រព្រះ ភាគខាងកើត ខេត្ត បន្ទាយមានជ័យ មានលទ្ធភាពស្រោចស្រពផ្ទៃដីស្រូវវស្សាចំនួន ៣៥.០០០ហិកតា និងស្រោចស្រពផ្ទៃដី ស្រែប្រាំងចំនួន ១៥.០០០ហិកតា។

បន្ទាប់ពីបានទទួលព័ត៌មានធាតុចូល និងការលើកឡើងអំពីបញ្ហាប្រឈមនានា អនុក្រុមការងារបច្ចេកទេសដោយមានការគាំទ្រពីទីប្រឹក្សាគម្រោង WAT4CAM នឹងរៀបចំឲ្យចេញជារូបរាងនូវនីតិវិធីឬ សៀវភៅគោលការណ៍ណែនាំសម្រាប់ការគ្រប់គ្រង និងកិច្ចដំណើរការអាងស្តុកទឹក (Reservoir Operation&Managment and dam safety) ឲ្យមានប្រសិទ្ធភាព និងនិរន្តរភាព៕