ឯកឧត្តម ចាន់ ស៊ីណាត រដ្ឋលេខាធិការ ប្រធានមុខព្រួញទិសខេត្តបន្ទាយមានជ័យ បានអញ្ជើញដឹកនាំការចុះត្រួតពិនិត្យសភាពការទឹកក្នុងតំបន់ព្រៃខ្ពស់ តំបន់អូរដូនតាសណ្តាន់ តំបន់អូរដូនឪ តំបន់អូរម្កាក់ តំបន់អូរចារ តំបន់អូរស្ងួត តំបន់សឿ តំបន់ពោធិពីរដើម និងជម្រុញការងារការដ្ឋានសំណង់ប្រព័ន្ធធារាសាស្រ្តក្នុងតំបន់ទាំងនេះឲ្យបានប្រព្រឹត្តទៅឆាប់ចប់តាមផែនការ 

ខេត្តបន្ទាយមានជ័យ ÷ នៅថ្ងៃចន្ទ ៩រោច ខែភទ្របទ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៩ ខែកញ្ញា ឆ្នាំ២០២២នេះ ឯកឧត្តម ចាន់ ស៊ីណាត រដ្ឋលេខាធិការនៃក្រសួងធនធានទឹក និងឧតុនិយម ដែលជាប្រធានមុខព្រួញទិសខេត្តបន្ទាយមានជ័យ និងមន្ទីរធនធានទឹក និងឧតុនិយមរបស់ខេត្តបន្ទាយមានជ័យ បានអញ្ជើញដឹកនាំការចុះត្រួតពិនិត្យសភាពការទឹកក្នុងតំបន់ព្រៃខ្ពស់ តំបន់អូរដូនតាសណ្តាន់ តំបន់អូរដូនឪ តំបន់អូរម្កាក់ តំបន់អូរចារ តំបន់អូរស្ងួត តំបន់សឿ តំបន់ពោធិពីរដើម និងជម្រុញការងារការដ្ឋានសំណង់ប្រព័ន្ធធារាសាស្រ្តក្នុងតំបន់ទាំងនេះឲ្យបានប្រព្រឹត្តទៅឆាប់ចប់តាមផែនការ។
ក្នុងពេលនោះ ឯកឧត្ដម លឹម គានហោ រដ្ឋមន្ដ្រីក្រសួងធនធានទឹក និងឧតុនិយម បានសម្រេចអនុញាតឲ្យធ្វើការដោះទឹកទាំងអស់ពីតំបន់ព្រំដែន និងតំបន់មេឡៃតាមសំណង់ប្រព័ន្ធធារាសាស្រ្តអូរចារដែលជាទឹកដ៏ធំចូលបឹងទន្លេសាបជាបន្ទាន់ដើម្បីបញ្ជៀសការជន់លិចក្នុងខេត្តបន្ទាយមានជ័យ ក្នុងពេលនេះ។ ម្យ៉ាងទៀតដោយសារខេត្តបន្ទាយមានជ័យ ក៏ដូចជាបណ្តាខេត្តដ៏ទៃទៀតដែរតែងតែយាយីដោយឥទ្ធិពលវិសម្ពាធទាប បាតុភូតធម្មជាតិនានា និងបម្រែបម្រួលអាកាសធាតុឥតស្រាក់ស្រានធ្វើឲ្យមានជំនន់ទឹកភ្លៀងយ៉ាងកំហុកដែលជាការបង្កឲ្យជន់លិចយ៉ាងលឿន អាស្រ័យហេតុនេះហើយទើបក្រសួងធនធានទឹក និងឧតុនិយម ធ្វើការជួសជុលស្តារឡើងវិញលើអូរដូនឪ និងអូរម្កាក់ដើម្បីជួយដោះទឹកជំនន់គ្រប់ប្រភេទឲ្យធ្លាក់ចូលបឹងទន្លេសាប បានលឿនបញ្ជៀសឲ្យខាងតែបានលើការជន់លិចខេត្តបន្ទាយមានជ័យ ៕