អំពីក្រសួង
ក្រសួងធនធានទឹក និងឧតុនិយម បំពេញបេសកកម្មជាសេនាធិការឱ្យរាជរដ្ឋាភិបាលកម្ពុជាលើការងារដឹកនាំនិងគ្រប់គ្រងវិស័យធនធានទឹក និងឧតុនិយម រួមបញ្ចូលទាំងការងារ គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប។
បេសកកម្មនេះធ្វើឡើងតាមរយៈការរៀបចំ និងការអនុវត្តឱ្យបានត្រឹមត្រូវនូវគោលនយោបាយ ក្របខណ្ឌច្បាប់ និងលិខិតបទដ្ឋានគតិយុត្តផ្សេងទៀតដែលទាក់ទងនឹងការដឹកនាំនិងការគ្រប់គ្រងវិស័យធនធានទឹក និងឧតុនិយម រួមបញ្ចូលទាំងការងារគណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប។
ក្រសួងធនធានទឹក និងឧតុនិយម មានមុខងារនិងភារកិច្ចដូចខាងក្រោម៖
• កំណត់គោលនយោបាយ និងយុទ្ធសាស្ត្រអភិវឌ្ឍន៍ធនធានទឹក និងឧតុនិយម បម្រើដល់ការធ្វើអាជីវកម្ម ការអភិវឌ្ឍ និងការថែរក្សាការពារប្រកបដោយនិរន្តរភាពជា លក្ខណៈជាតិ និងអន្តរជាតិស្របតាមកម្មវិធីនយោបាយរបស់រាជរដ្ឋាភិបាល
• សិក្សាស្រាវជ្រាវនូវសក្ដានុពលទឹក រួមទាំងទឹកលើដី ទាំងទឹកក្រោមដី និងទឹកលើអាកាស ក្នុងក្របខណ្ឌជាតិ និងអន្តរជាតិ ដើម្បីបង្កើតឡើងនូវមូលដ្ឋានបច្ចេកទេស វិទ្យាសាស្ត្រច្បាស់លាស់
• លើកទិសដៅផែនការរយៈពេលខ្លី មធ្យម និងវែង ក្នុងការធ្វើអាជីវកម្ម ការអភិវឌ្ឍ និងថែរក្សា ការពារនូវធនធានទឹក ដើម្បីបម្រើដល់សេដ្ឋកិច្ចជាតិ ជីវភាពរស់នៅរបស់ប្រជាពលរដ្ឋទាំងនៅទីក្រុង និងទាំងនៅជនបទ
• គ្រប់គ្រង ត្រួតពិនិត្យនូវរាល់ការធ្វើអាជីវកម្មលើធនធានទឹកដោយផ្ទាល់ និងប្រយោលប្រកបដោយសនិទានភាព និងកាត់បន្ថយឱ្យបានជាអតិបរមានូវគ្រោះមហន្តរាយដែលអាចកើតមានឡើង
• រៀបចំតាក់តែងច្បាប់ លិខិតបទដ្ឋាន និងបទប្បញ្ញត្តិផ្សេងៗ ដែលពាក់ព័ន្ធនឹងការគ្រប់គ្រងធនធានទឹក និងឧតុនិយម ព្រមទាំងតាមដានលើការអនុវត្ត
• ប្រមូលចងក្រងឯកសារ និងធ្វើអាជីវកម្មនូវទិន្នន័យឧតុនិយម និងជលសាស្ត្រ បម្រើដល់វិស័យនានា ដែលមានការពាក់ព័ន្ធជាលក្ខណៈជាតិ និងអន្តរជាតិ ដើម្បីផលប្រយោជន៍សង្គមជាតិទាំងមូល
• ផ្ដល់ការគាំទ្រ និងការណែនាំបច្ចេកទេសជាចាំបាច់ដល់ឯកជន អង្គការវិជ្ជាជីវៈ សហគមន៍ និងប្រជាពលរដ្ឋទូទៅដែលមានការពាក់ព័ន្ធដើម្បីកែលម្អ និងធ្វើអាជីវកម្មធនធានទឹកឱ្យបានសមស្រប
• ពង្រីក និងបញ្ចូលនូវបច្ចេកវិទ្យាទំនើបៗ ដើម្បីមានវិធានការបណ្ដុះបណ្ដាល កែលម្អ និងផ្សព្វផ្សាយ
• ពង្រឹង និងពង្រីកកិច្ចសហប្រតិបត្តិការជាតិ និងការងារសហប្រតិបត្តិការអន្តរជាតិលើ វិស័យធនធានទឹក និងឧតុនិយម
• ចូលរួមអនុវត្តការងារពាក់ព័ន្ធនឹងអាងទន្លេមេគង្គ ស្របតាមភារកិច្ចរបស់ក្រសួង។