នៅថ្ងៃអង្គារ ៣កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣ ខែធ្នូ ឆ្នាំ២០២៤ នេះ ឯកឧត្តមសាស្រ្តាចារ្យបណ្ឌិត អឿង ចន្ថា អនុរដ្ឋលេខាធិការ និងជាប្រធានលេខាធិការដ្ឋានគណៈកម្មាធិការជាតិគ្រប់គ្រងអាងទន្លេ ក្នុងនាមតំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានអញ្ជើញចូលរួមជាវាគ្មិនក្នុងសន្និសីទ និងពិព័រណ៍ទឹកស្អាតកម្ពុជាលើកទី៥ ក្រោមប្រធានបទ «ទឹកដើម្បីនិរន្តរភាពអនាគត» និងជាវាគ្មិនកិត្តិយសក្នុងកិច្ចពិភាក្សាស្តីពី “តើក្រសួងធនធានទឹក និងឧតុនិយម រួមចំណែកអ្វីខ្លះ ដើម្បីឱ្យយុទ្ធសាស្ត្របញ្ចកោណដំណាក់ទី១ លើវិស័យទឹកស្អាតរបស់រាជរដ្ឋាភិបាលសម្រេចបានជោគជ័យ” នៅសណ្ឋាគារសុខាភ្នំពេញ រាជធានីភ្នំពេញ។

 

សូមជម្រាបថា សន្និសីទ និងពិព័រណ៍នេះរៀបចំឡើងរៀងរាល់ពីរឆ្នាំម្តង ក្រោមកិច្ចសហការគ្នារវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងសមាគមអ្នកផ្គត់ផ្គង់ទឹកស្អាតកម្ពុជា ដោយមានការគាំទ្រពីស្ថានទូតអូស្ត្រាលី តាមរយៈកម្មវិធីភាពជាដៃគូកម្ពុជាអូស្ត្រាលីសម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRAD) និងសមាគមទឹកអូស្រ្តាលី ដែលមានការចូលរួមពីតំណាងក្រសួងធនធានទឹក និងឧតុនិយម ធនាគារពិភពលោក អង្គការចៃកា(JICA) និងដៃគូអភិវឌ្ឍន៍ក្នុងវិស័យទឹកស្អាតជាតិ និងអន្តរជាតិ។

ឯកឧត្តមអនុរដ្ឋលេខាធិការបានមានប្រសាសន៍ឱ្យដឹងថា សន្និសីទ និងពិព័រណ៍នេះមានគោលបំណង ដើម្បីបង្កើតជាវេទិកាពិភាក្សារវាង រាជរដ្ឋាភិបាល ដៃគូអភិវឌ្ឍន៍ ក្រុមហ៊ុនផ្គត់ផ្គង់សម្ភារៈទឹកស្អាត និងប្រតិបត្តិករផ្គត់ផ្គង់ទឹកស្អាតឯកជន ក្នុងការដោះស្រាយបញ្ហាប្រឈម ការចែករំលែក និងការស្វែងយល់ច្បាប់នានា បច្ចេកវិទ្យាថ្មីៗ សម្រាប់អភិវឌ្ឍន៍វិស័យទឹកស្អាតនៅកម្ពុជា។

 

ទន្ទឹមនឹងនេះ ក្នុងកិច្ចពិភាក្សា ឯកឧត្តមអនុរដ្ឋលេខាធិការបានបញ្ជាក់ថា ក្រសួងធនធានទឹក និងឧតុនិយមបានចូលរួមយ៉ាងសកម្មក្នុងការអភិវឌ្ឍវិស័យធនធានទឹក ដើម្បីចូលរួមគាំទ្រឱ្យយុទ្ធសាស្រ្តបញ្ចកោណដំណាក់កាលទី១ លើវិស័យទឹកស្អាតរបស់រាជរដ្ឋាភិបាលសម្រេចបានជោគជ័យ តាមរយៈគម្រោង និងការរៀបចំផែនការបង្កើតអាងទឹក ស្តារអាងទឹក និងពង្រីកសក្តានុពលប្រភពទឹកដែលមានស្រាប់ ដើម្បីបំពេញនូវតម្រូវការប្រើប្រាស់ពហុវិស័យ គឺមិនត្រឹមតែការស្រោចស្រពវិស័យកសិកម្មប៉ុណ្ណោះទេ ជាពិសេសបំពេញតម្រូវការសម្រាប់ការប្រើប្រាស់ដល់វិស័យទឹកស្អាត កាត់បន្ថយបាននូវគ្រោះទឹកជំនន់ និងគ្រោះរាំងស្ងួតជាអតិបរមាផងដែរ៕