ភាសាខ្មែរ
សារពីឯកឧត្តមរដ្ឋមន្ត្រី
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម
កម្ពុជាត្រូវការបង្កេីតអាងទឹក ស្តារអាងទឹក និងពង្រីកសក្តានុពលប្រភពទឹកដែលមានស្រាប់ដេីម្បីបំពេញនូវការស្រោចស្រព
វិស័យកសិកម្មនិងបំពេញតម្រូវការសម្រាប់ការប្រើប្រាស់ទឹកស្អាត កាត់បន្ថយបាននូវគ្រោះទឹកជំនន់ និងគ្រោះរាំងស្ងួតជាអតិបរមា
ឯកឧត្ដម ប៊ុន ហ៊ាន រដ្ឋលេខាធិការ អញ្ជើញជាសហអធិបតីក្នុងពិធីបើកសិក្ខាសាលាពិគ្រោះយោបល់លើកទី៤ ស្តីពីការរៀបចំឯកសារស្តង់ដាជាតិប្រព័ន្ធធារាសាស្ត្រ
ផុសថ្ងៃ: 20-01-2026 | អ្នកអាន: 108 |
Shareនាព្រឹកថ្ងៃអង្គារ ២កើត ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២០ ខែមករា ឆ្នាំ២០២៦ នៅសណ្ឋាគារកាំបូឌីយ៉ាណា ឯកឧត្តម ប៊ុន ហ៊ាន រដ្ឋលេខាធិការ និងជានាយកគម្រោងស្តង់ដាជាតិប្រព័ន្ធធារាសាស្រ្ត ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម និងលោកស្រី Miyashita AKiko អនុប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) អញ្ជើញចូលរួមជាសហអធិបតីក្នុងពិធីបើកសិក្ខាសាលាពិគ្រោះយោបល់លើកទី៤ ស្តីពីការរៀបចំឯកសារស្តង់ដាជាតិប្រព័ន្ធធារាសាស្ត្រ ដោយមានការចូលរួមពីតំណាងក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ មន្ត្រីនាយកដ្ឋាន និងមន្ទីររាជធានី-ខេត្តទាំង២៥ ព្រមទាំងតំណាងកុងស៊ុលតង់សរុបចំនួន ៧០នាក់។
ឯកឧត្ដមរដ្ឋលេខាធិការបានមានប្រសាសន៍ថា គោលបំណងសំខាន់នៃការរៀបចំសិក្ខាសាលាពិគ្រោះយោបល់លើកទី៤ គឺផ្តោតសំខាន់លើការបង្ហាញពី៖ ទី១)សេចក្តីព្រាងចុងក្រោយនៃឯកសារលក្ខណៈវិនិច្ឆ័យ ទី២)សៀវភៅបទដ្ឋានបច្ចេកទេសសម្រាប់ការសិក្សា បណ្តុំសំណង់មេ (សំណង់ក្បាលហុងទឹក) និងការងារប្រឡាយ និងទី៣)សេចក្តីព្រាងចុងក្រោយនៃគំនូសប្លង់បច្ចេកទេសសម្រាប់ការងារប្រឡាយដែលបានធ្វើបច្ចុប្បន្នភាព ដោយផ្អែកលើលទ្ធផលកិច្ចប្រជុំរបស់គណៈកម្មាធិការតាមដាន និងត្រួតពិនិត្យ និងអនុសាសន៍ពីដៃគូអភិវឌ្ឍន៍នានា។
ឯកឧត្តមរដ្ឋលេខាធិការបានសំណូមពរដល់សិក្ខាកាមទាំងអស់ដែលបានអញ្ជើញចូលរួមក្នុងអង្គសិក្ខាសាលានេះ ជួយផ្សព្វផ្សាយ និងប្រើប្រាស់ឯកសារស្តង់ដាជាតិប្រព័ន្ធធារាសាស្ត្រនេះឱ្យបានទូលំទូលាយ និងមានប្រសិទ្ធភាព នៅពេលឯកសារនេះត្រូវបានរៀបចំចប់សព្វគ្រប់។
សូមជម្រាបថា គិតត្រឹមចុងខែធ្នូ ឆ្នាំ២០២៥ នេះ គម្រោងរៀបចំឯកសារស្តង់ដាជាតិប្រព័ន្ធធារាសាស្ត្រ សម្រេចបានលទ្ធផលការងារមានដូចជា៖
ទី១)បានរៀបចំសេចក្តីព្រាងបញ្ចប់នូវលក្ខណៈវិនិច្ឆ័យសម្រាប់ការសិក្សា និងការគ្រោងប្លង់សម្រាប់បណ្តុះសំណង់មេ (សំណង់ក្បាល ហុងទឹក) និងសម្រាប់ការងារប្រឡាយ
ទី២)បានរៀបចំសេចក្តីព្រាងបញ្ចប់សៀវភៅណែនាំបទដ្ឋានបច្ចេកទេសសម្រាប់ការ សិក្សា និងការគ្រោងប្លង់បណ្តុំសំណង់មេ (សំណង់ក្បាលហុងទឹក) និងសម្រាប់ការងារប្រឡាយ
ទី៣)បានរៀបចំសេចក្តីព្រាងបញ្ចប់ បទដ្ឋានគំនូសប្លង់បច្ចេកទេសសម្រាប់ការសិក្សាការគ្រោងប្លង់ការងារប្រឡាយ
ទី៤)បានបញ្ជូនមន្ត្រីសមភាគីគម្រោងទៅចូលរួមវគ្គបណ្តុះបណ្តាលនៅប្រទេសវៀតណាម ប្រទេសចថៃ និងប្រទេសជប៉ុន ដើម្បីសិក្សាស្វែងយល់ពីការរៀបចំឯកសារស្តង់ដាជាតិប្រព័ន្ធធារាសាស្ត្រនៃប្រទេសទាំង ៣
ទី៥)បានរៀបចំកិច្ចប្រជុំគណៈកម្មាធិការសម្របសម្រួលរួមចំនួន ៣ដង ទី៦)បានបើកវគ្គបណ្តុះបណ្តាលគ្រូបង្គោលចំនួន ២វគ្គ
ទី៧)បានបើកវគ្គបណ្តុះបណ្តាលដល់មន្ត្រីបច្ចេកទេសក្រសួង ចំនួន ៥វគ្គ
ទី៨)បានបើកវគ្គបណ្តុះបណ្តាលដល់មន្ត្រីបច្ចេកទេសក្រសួង និងខេត្តចំនួន ១វគ្គ
និងទី៩)បានបង្កើតគណៈកម្មាធិការតាមដាន និងត្រួតពិនិត្យការអនុវត្តឯកសារស្តង់ដាជាតិ និងបានរៀបចំកិច្ចប្រជុំរបស់ខ្លួនចំនួន ៤ដង៕
